بسم الله الرحمن الرحيم
السلام عليكم رحمة الله وبركاته
سج الخلا دامك معافا وميسور
واضرب فيافي نجد واعرف ديرها
كان الجدا بالوقت فالوقت مدحور
تلقا طويل اليوم والليله ارها
ترا السنه تنثر من ازمانها بحور
ثلاث ميه واشهرين بقمرها
وان كانها الدنيا دنانير واقصور
كم واحدن حدر الثرا ما عمرها
سج القدم واغنم من العلم بالشور
والانفس دواها مصارف بشرها
روحك لها يمناك مروا ودكتور
ان شيت تتركها او ان شيت مرها
راقب مجي سهيل مع شقت النور
عقب الفجر عينك جنوب بنظرها
واليا عرض لك كنه تريك مشهور
ولم زهابك والنواقص اشرها
جهز معاميلك وفرشه ودافور
جميعها العده وش اللي قصرها
سيارتك هي عزوتك لو هي سبور
عاين عيار الزيت وافحص كفرها
لا تهمل الاسبير واشتر لك سيور
لزومها ما يغبن اللي خسرها
والمرقعه خذها وكنود وماطور
على الله صدوف الدروب وخطرها
ساير وساع الدو عن ضايق الدور
تقاصا بالبيدا وطاول بحرها
رح للنفود وقاسي الحزم والقور
وادرج مع الضلعان لين محجرها
شب اللهب من يابس العرن مكسور
حذرا عن المبرض بعالي شجرها
واضرب على قاع النجر هيل منثور
واحمس هراري لين ياضح شقرها
ازرع للاخرا وان سها القلب معذور
واقطف من الدنيا نواصي زهرها
الشاعر يوسف الخليفه
الثلاثاء يوليو 05, 2011 12:24 am